2011年11月30日星期三

請大家食 $1,000 纖形、美肌、排毒麵！

嘩嘩嘩！無條件送出40包我極喜歡的肌っ子蒟蒻麵俾大家，仲要係送到你哋府上，祝愈食愈靚呀！

上年6月，我寫了一篇OL 超滿足瘦身餐，話俾大家知「食極唔肥」，唔再係奢望！
究竟食咩唔肥又好味？
請大家重溫http://vipblog.orientalsunday.hk/yokot/?p=631。

事隔一年多，我極喜歡的肌っ子蒟蒻麵又有新搞作，就係「纖吃纖盈麵」，個名咁架勢，即係乜東東？
蒟蒻麵玩花臣，舊有的是富含膠原蛋白美肌聖品，新登埸的是排毒聖品，同樣屬低卡路里，包保食咗唔怕肥！
即食麵我戒咗好多年，重量級油、鹽及味精，我點會放入口；麵包、餅乾都唔啱我口味，乾糧乾爭爭嘛，所以我屋企糧食倉必備肌っ子蒟蒻麵，無時無刻可以歎到一碗熱騰騰湯麵，仲要食完無罪咎感，真係好滿足！無須開火煮，有熱水就食得，似足杯麵咁方便，但健康多多聲，製作超方便，OL們至啱feel。
肌っ子「纖吃纖盈蒟蒻麵」 $25／包 (各莎莎有售)
四款口味，包括綜合海鮮、韓式泡菜、香菇雞汁及紅燒牛肉，高纖維且低卡路里，每包不超過55卡路里，食塊餅都唔止啦！
最好味竟然係我本來最無興趣嗰款---韓式泡菜(因為怕辣，從來只會淺嚐這實物) ，點知原來一點兒也不辣的，味道是衆者中最惹味；雖則我一向偏好清淡口味，但香菇雞汁湯底真的太淡了，所以切忌放得太多水。

點解「纖吃纖盈麵」能以排毒功效掛帥？
蒟蒻麵加入了被喻為「海底燕窩」的天然綠藻及海藻製成。
綠藻蘊含豐富的鎂質及「綠藻素生長因子」，能加速新陳代謝，加上海藻含豐富食物纖維，幫助腸道蠕動，可清除體內之毒素和幫助消化，有美肌的療效。
此外，還加入維他命B、奧米茄3脂肪酸，及多種人體所需的微量元素，如鐵、鋅、硒、鈣等，聲稱能防止皮膚粗糙，延緩細胞衰老添！

食用方法：
無須開火煮，有齊以上組合就食得--熱水、碗、麵，只須以下兩個步驟即成。
Step 1：先將麵條拆開，放入碗中以熱水沖洗，再換熱水浸3分鐘；
這是我喜歡的QQ口感 (若然愛麵較軟身，建議可浸多2分鐘) 。
Step 2：將調味料加入200毫升的熱水中，然後將已浸軟的麵條加入湯底碗中即成。
可自行添加配菜，如粟米仔及葱花。

對於我這大胃王，這新款蒟蒻麵竟然有足夠飽肚感，與舊有一陣風落肚有天淵之別，相信是麵條主打添加成分海藻，纖維高可以頂肚，又可滿足為食心魔，宵夜大派用場呀，想保持纖盈身段，邊使節食咁辛苦啫！



免費送出40包肌っ子「纖吃纖盈麵」！
參加方法好簡單：
今日起至12月1日，請在Yoko《MORE》VIP blog： http://vipblog.orientalsunday.hk/yokot/?p=5336 留言，即有機會獲獎：
「請留言想獲得肌っ子「纖吃纖盈麵」 因由！」
由我挑選答得最出色的40位。
***得獎者將獲莎莎集團官方電郵通知，並敬請回覆地址，以供郵寄「纖吃纖盈麵」(*只限居於香港人士)。
多謝大家參加唷！
————————————————————————————————————————
本週《MORE》專欄精采內容：
灰姑娘Pre-makeup魔法萬能水
假如，施展魔法能讓你嘗得美麗時限，然而8小時後一瞬即逝，你願意接受麼？
葫蘆裏究竟賣什麼藥呢？詳情請留意今期《MORE》雜誌內我的專欄。



發佈者： Yoko Tsang 於 00:28 0 留言
標籤：

2011年11月28日星期一

面膜餐單Round 9--- 極緻濕潤矜貴孖寶

上回介紹平價保濕 gel mask---- 是只售 $132 的 Neogence 玻尿酸保濕舒緩修護凍膜。
在該文章尾聲，我有以下引子：
上述是否極緻保濕？老實說，以價錢論成效已算不俗了，勤敷也見效用的；若然有重要 function 出席或光學後肌膚脆弱之時，我會有 other best choice--- 強勁急救面膜推介，俾個心理準備大家……一分錢一分貨呀！

顯而易見，Neogence 呢款 mask 在我心底裏，只可供平用密密敷，但未夠喉喎，等同「我的美麗日記」、「廣源良」、「Sexy Look」等質素般。
該文章見街後，我「很高興」收到一位讀者留言：「用過啦，唔得喎….. 」
何解「很高興」？
即係你哋有高要求。

好，今日揭曉真正滿足，能為肌膚解渴矜貴孖寶！

高效保濕精華液＋3D營養面膜
雖則說成是孖寶，其實分拆各自單獨用也可，而這組合是我不惜功本要保濕成效加加加倍。

這孖寶是歐洲美容品牌 Infusens，你唔識？唔出奇吖！它不如一般大牌子豪花宣傳費，廠方集中火力在研發及素材上，成本已相當高，看零售價便知，若然再加千軍萬馬廣告，mark up price真不敢想像呀！未講解我嘅使用心得前，先要指出呢兩件保濕妙品有咩獨特之處，令我對其營養成分彷如打咗強心針。

首先，是法國及瑞士大廠製造的；用上 medical grade 透明質酸及水解膠原蛋白，乃強而有力保濕增彈性成分，較一般護膚品聲稱注入的保水和彈性因子成本「重皮」得多，美肌效果當然顯著得多。
加上專利導入技術及研發成分粒子達納米級細小，容易被皮膚滲透，達致持久鎖水效果。
Main point是獨有「智慧型配方」！即係乜東東？精華液及面膜兩者，「能因應空氣中的濕度為肌膚作出調節」，即係話秋冬天氣極乾燥，皮膚愈特別缺水，吸濕力會自然加倍；原理彷如是乾爭爭海綿遇水自然會狂吸咁解！
Infusens 高效保濕精華液 $1,280 ／盒 (10支／各4ml)
珍貴成份及效用：
水溶性殼相聚醣：水份及黏性含量極高的海洋纖維，即時為乾燥肌膚補充大量水份，減少油脂分泌，令水油平衡，肌膚健康。
巨海帶：乃罕有天然成份，能促進細胞更生，鎖緊肌膚水份，修復受損肌膚。
水解麥蛋白：的產生於肌膚表面形成如薄絲般的保護膜，增加彈性、撫平紋理改善粗糙。
 Infusens 3D營養面膜 $1,040／盒 (6片)
面膜質地極討好，柔軟又極富彈性，如何拉扯也不會撕裂，
觸感似薄膜，能給予彷如第二層肌膚般緊貼。
活躍成份及效用：
透明質酸：保濕能力特佳，能協助細胞進行修補及更新；維持皮膚的彈力纖維和膠原蛋白健康，增加皮膚彈性和柔滑度。
水解米糠蛋白：含豐富水溶性蛋白質，幫助膠原蛋白增生，有效緊緻肌膚提升面部輪廓。
甘草精華：天然配方舒緩降敏，為敏感皮膚排走毒素。
紅莓精華：含有豐富維他命C擊退黑色素，以天然方法逐步美白淡斑。
桑椹精華：除豐富的維他命C外，兼含人體所需的 8 種氨基酸，能促進新陳代謝，增強皮膚抵抗力。

極緻保濕孖寶使用心得：
Step 1：潔面及爽膚後，先於全面、眼部及頸部塗上整支精華液。
 Step 2：接著覆蓋 paper mask，質地極討好，柔軟舒適又極富彈性的，觸感似薄膜，一接觸肌膚便牢牢緊貼，任由我點郁動，直頭跑步都唔會甩呀，好處是製造密封式環境，有助營養迫入肌膚！
至誇張是面膜袋內的精華多得有點兒過份，足以全身搽勻，絕無誇張，我每次敷上時都會重覆以下步驟：就是洗澡前敷上面，洗澡後將袋內剩餘精華塗全身當作 body mask，皮膚好快吸收晒，無須清洗。一片成二百幾銀咁矜貴，當然要用盡佢至化算！

使用方法：敷上20分鐘後，於全面噴上保濕礦泉水或玫瑰水，然後以化妝棉輕抹掉多餘精華，之後塗上抗皺面霜封鎖保濕營養便可。
完成後撕開面膜的一刻，感覺會與使用一般保濕 paper mask 有所不同，因為皮膚看來不算很水感，點解？剛才用上那麼多的精華全部去晒邊？成功滲透囉，敷 mask 後肌膚表面太濕潤其實先至唔好，原因一：即刻成分粒子太大只停留在表皮層；原因二：老化角質阻礙皮膚吸收營養。
敷完這 mask 後皮膚不但柔滑富彈性，最意想不到是有冰涼感，可舒壓降温。
建議每星期一次作保養，改善偏乾粗糙膚質，或於光學後供即時補給。

 我喜歡的又為大家爭取了折扣！ 
***凡出示此文章購買以上兩盒產品(任何組合也可)，可享 8.5 折優惠。

售賣點 ：
Beauty Glow
羅素街38號金朝陽中心37樓                                     2970 2188
尖沙咀加連威老道2-6號愛賓商業大厦3樓301室      2301 3288
Phillip Wain
尖沙咀金巴利道1-23號美麗華商場5字樓                 2377 3888
銅鑼灣恩平道28號利園2期4字樓                             2882 7880
太古城中心第4期2字樓                                            2513 1333
————————————————————————————————————————
本週《MORE》專欄精采內容：
灰姑娘Pre-makeup魔法萬能水
假如，施展魔法能讓你嘗得美麗時限，然而8小時後一瞬即逝，你願意接受麼？
葫蘆裏究竟賣什麼藥呢？詳情請留意今期《MORE》雜誌內我的專欄。




發佈者： Yoko Tsang 於 02:22 0 留言
標籤：

2011年11月25日星期五

年輕十歲的簡易星級秘方！

幾個月前，與一位開了廿年美容院的老行尊晚飯，趁機吸收她的美容知識，當晚她爆了身邊好友一個鮮為人知的秘密出嚟，笑著再三叮囑我：「千奇唔好開名，否則一定知係我講....哈哈！」

Promise……是關於那位星級阿姐我不會公開，卻認為很值得透露箇中美肌秘笈呢！

50幾歲人，皮膚卻似40歲之謎？
原來這位星級阿姐駐顏秘笈是，廿年來堅守「四季洗臉皆過冷河」。
她的瘋狂舉止是早晚每次洗臉後，將臉塞進盆浸冰水半分鐘，並沒加插特別保養程式，平常搽保濕敷面而已，美容機都無做過(聽聞生性孤寒喎！)
看似匪夷所思，咁簡單？真的嗎？其實心底裏我是相信成效的，但不認同100%仿傚。

自從，我有幸得知這保童顏法，立即通知媽咪跟隨，大家傾談磋商後扭轉了少許原意，就是不浸冰水，改為「潑冷水」，將小支裝 Watson’s 樽注滿水循環雪凍，每次洗臉後，將水倒在掌心不停潑上面起碼 20 次。既有原創功效又不會凍傷肌膚呢！
我哋已經跟足好幾個月，即時冰涼感覺會覺得皮膚特別清爽乾淨，用上一至兩星期最明顯係油脂出少咗，持之以恆，相信皮膚緊緻和彈性度必有進步。

反正唔使破費又簡單易做，姊妹們幾懶都應試吓啦！

「過冷河潔面法」年輕十歲，原理是什麼？
正確的洗臉方法，確是做好護膚的第一步。洗臉與肌膚質素有著很密切的關係，洗臉不徹底，洗臉不正當，都會令肌膚造成負擔。
 我建議「溫水和冷水交替潔面法」，先向大家解釋水溫對皮膚的效用：
潔面的水溫切勿不要太熱，略高於皮膚溫度，以30℃左右為宜，讓毛孔擴張，好讓藏在裡面的油脂和污垢充分洗掉，這種溫水，既能潔膚，又能對皮膚起舒緩鬆弛作用，對皮膚零刺激無傷害。
忌太高水溫的原因是，擴張毛細血管容易帶走肌膚過多油脂，破壞肌膚內的膠原織維，令皮膚變得乾燥和鬆弛，容易出乾紋和皺紋。
以溫水洗淨潔面用品後，再用冷水潑面可以使血管收縮，有反射性充血現象，這樣可達致血液循環的效果；此外，皮脂腺、汗腺分泌因而減少，有收斂毛孔作用，也能使人精神振奮，最啱晨早撲返工醒一醒神。
但切忌用過冷的水接觸面龐太久，輕則對皮膚滋養不利、重則凍傷皮膚啊！所以星級阿姐的將臉塞進盆浸冰水半分鐘秘技，大家還是不要冒險。


通過潔面水溫的冷熱變換，可使皮膚淺層血管擴張和收縮，等同增強皮膚的呼吸，促進面部的血液循環，達到美容效果，使皮膚更光滑細膩。
問題係你能否堅持？無論春夏秋冬一直用下去喎！
————————————————————————————————————————
本週《MORE》專欄精采內容：
嶄新次世代零皺紋不老療法
美容界的抗老主角是誰？「胜肽」是也，必要一試才滿足的，是兩個月前首度抵港的「次世代胜肽去紋緊肌療程」及一件高科研抗衰老逆轉時光產品。
詳情請留意今期《MORE》雜誌內我的專欄。
發佈者： Yoko Tsang 於 00:16 0 留言
標籤：

2011年11月24日星期四

遲來的報告！不敗的皇鳳

10月1日，我發了這條微博：
7日內，我光顧了「皇鳳港式燒烤」兩次！這是我一向的做法，遇上好味的餐廳，盡快短時間內食多幾次，免得日後飲食傳媒廣泛報導後，一係勁等位，一係人太多，大廚應付不來導致食物質素下降。例子係中環豚王拉麵，他開業首星期已經連食兩次，仲食均四款拉麵，現在就排晒長龍囉。（順帶一提，豚王今個星期在銅鑼灣登龍街開了新分店，希望可以減輕中環人龍，等我可以再嚐。）
對上幫襯兩次都冇寫食評，心態係帶點自私，這些開在隱蔽橫街的小店，就當作我心中的秘密食堂吧，何況有星級老闆壓場，做朋友客都夠維本，無謂搞到人家手忙腳亂吧！
可是，上星期五第三次光臨，一行五人一早訂晒位都要bar table，皇鳳已經得道，變成人氣食堂，加上即晚就有網友Debby留言：
好食呀！所以呢個食評，注定要寫！
先睇下環境，我同朋友一行五人，一定排開坐Bar table，雖然傾偈唔方便，但第一身睇住師傅新鮮上菜囉。
老闆之一係前Sun Boyz成員Dennis，由當年一個害羞小男孩變成獨當一面的掌舵人，真係睇住佢成長。點解咁講？當年Sun Boy'z的stylist就係由本人擔任，一次過幫三位男孩負責造型，唔容易的！對Dennis的最大印象係---呢個世界點解會有一個零毛孔陽光男孩！皮膚質素好到無法形容，就算到今日都一樣咁無瑕，大家不妨細心觀察。
講番食物，其實BBQ要好食，真係一D都唔難，連大廚都笑自己唔識煮野食，淨係識BBQ。不過BBQ之中，能夠燒得掂海鮮，就真係唔多人做人，所以皇鳳咁人氣，多得大廚拿手燒海鮮。
燒蝦蝦，一字排開，夠晒氣勢！大廚仲會玩下噴火娛賓，夠晒熱鬧。
同行為食前輩好友P，劇讚燒蟶子的火喉掌握得無懈可擊，爽口、彈牙、鮮！再來燒鮑魚，燒得唔韌已經算叻，燒得惹味先一絕，唔使用刀叉，一啖放入口，鮑汁滿瀉。
貝殼類食物因有殼連住傳熱，所以唔容易處理。既然貝殼類食物都咁好味，燒馬友就梗係駕輕就熟啦！
食到中段就要燒碟生菜中和一下口味，全部菜都係新鮮上爐即燒，冇話先灼熟再燒，新鮮。
食完就到戲肉，一堆肉類緊接上場，生姜燒豬肉薄餅首先登場，屬自創菜式，我就第一次咁樣好法，外脆內爽。
激讚新鮮燒牛肉餅，肯定用新鮮牛肉即打而成，好似食薯片咁爽、快、脆！
連我最愛的燒牛舌都好似知我唔鍾意串上，全部一件件參上，再配最愛檸汁，正！
金菇牛肉卷，普通但不會讓人失望，只要唔韌已經算好叻。
最後壓軸係招牌燒年糕，當甜品埋尾，真真正正塞爆自己個胃。
其實最精彩係呢味燒魷魚乾，原條九龍吊片加蜜糖燒，再碎上，十足當年總統戲院門外的燒魷魚檔風味，可惜我唔飲酒，幾位酒友因此再點多幾杯大生啤，送酒就不能錯過！
因為Dennis的關係，以及另一位股東---星級排舞師 Sunny Wong 的號名力，短短時間已經有大量明星光顧過，好幾位仲返頭幫襯數次，絕對係因為好食而獲青徠！
食到最後，我最終都忍唔住要問，點解要幫間鋪起名「皇鳳」？皇鳳好叫口咩？又唔似。好意頭嗎？又不覺得。總係覺得有點搭不上，於是鼓起勇氣問個究竟。答案竟然係：「你唔覺，香港地的老牌、著名、屹立不倒的餐廳，唔係叫皇乜皇物、就係叫乜鳳物鳳？咁將呢兩個字加埋一齊叫皇鳳，但求做得長唔使執笠，已經萬幸！」咁都得？應該加長小小叫「皇鳳11」，咁就有機會千秋萬世！ 

皇鳳
灣仔灣仔聖佛蘭士街9-11號寶豐大廈地下A舖 
電話：2871 3388
————————————————————————————————————————
本週《MORE》專欄精采內容：
嶄新次世代零皺紋不老療法
美容界的抗老主角是誰？「胜肽」是也，必要一試才滿足的，是兩個月前首度抵港的「次世代胜肽去紋緊肌療程」及一件高科研抗衰老逆轉時光產品。
詳情請留意今期《MORE》雜誌內我的專欄。
發佈者： Yoko Tsang 於 00:01 0 留言
標籤：
訂閱： 文章 (Atom)